جميع حقوق النشر محفوظة

من إبداعات الشاعر عبدالله سامي .. قصيدة بعنوان “القهاوي”.

12434309_806025996191556_530706312_n

قصيدة بعنوان “القهاوي” من إبداعات الشاعر عبدالله سامي أحد شباب حلوان المبدعين ..إستمررًا للخدمة التي أطلقتها «شبكة حلوان أون لاين الإخبارية» “إبداعات” لنشر إبداعات شباب حلوان في جميع المجالات.

الليل بياكُل فالقهاوي
واحنا اشتهينا الطُعم عالآخر
بنشد بعض فنرد مش صادق
ونموِّت الفحم البريئ
مع كل غنوة بتتولد
نفتح طريق
حكايات كتيرة منوَّرة القهوة
بكَّار بصوته المستخبي هنا
مليان غُني كالطير بدون ما يهج
واقف يراقب من سنة للسنة
الولعة .. ويغني ليها ويبتهج
بيزيد وهج اول ما هي تزيد وهج
وكأنها سقَّفت
من فرط حُسن النغم
ويقول : يا رب انا لسه فيَّا ألم
ينزله وحي يقوله غني كمان
الولعة هي الآمان
والناس عدم
بكَّار هنا بيداري لحمه بفحم
او هو فحم اتقاد عليه م الصبر
الجمر زاد لكن ما ولَّعشي
ده العمر عمره ما يتحرق م الجمر
هنا حكايات كتيرة منوَّرة
بتونِّس القهوة
صاحبي اللي شال 50 سنة ع الكتف
بيسابق الزمن المريض بالصبر
كان مستعد العمر يخلص
فانتظار العمر
قلبه النحيف صاحب نجوم السما
جيبه الخفيف أكِّل لوشه القهر

شايفه
بينادي ع الشاي التقيل ب جنيه
وينادي ع الماضي بأمل
طرابيزة دايما تشتريه ببلاش
منفوضه من فعل الملل
تقعد هنا تلقي الكلام يجري
بدون ما تحس
الشيشة قاعدة ترصِّنا فنولع رص

هناك كان شاب ماركسي
قاعد يشاور ع القمر ويقول : امتي
ترمي لنا مفتاح الميدان والحلم ؟
سِمع صوت الحلل بيزن
وقف يحلل رؤية المشهد
و الناس تبص بكل تركيزها
وكأنه بالنسبه له
مشهد وقوع الثورة م المطبخ
فكأنهم تلاتين جبان ما قاموش
فحين
ان العصاية هناك من ضربها
بتصرخ
كان هو ده رأيه
من فرط شوقه للميدان عجِّز
نط الكلام من بوءه مش دريان
وانتحر فالخوف

مين السبب في الموقف الحالي
مين اللي شد العالم الأكبر
للقعدة ع القهوة
الجاي والحاضر والثورة والغنوة
والحلوة والوحشة والوحشة والحلوة
لكن هنا يمكن
اول مكان للنور
اول زيارة للقمر بيكون
و آخر زيارة للوجع فالفجر
هنا السما دايما تنقسم وتشُر
المر جوا البن
او
البن جوا المر

هنا
حكايات كتيرة منوَّرة
هي اللي ساندة القهوة من فِعل الزوال
كان سهل جدا تبقي مكتب للمحامي
او مكان بيدحرجوا الكورة الشراب فيه
للعيال
كان سهل جدا يبقي مدفن
بنصب فيه كل اللي شافوا السر
وكأنهم قربان بنقدمه للأرض
انا باعتقد
ان القهاوي كل ده مع بعض

وعشان كده
من اول التواريخ و لآخر الدنيا
الليل هيفضل ياكل القهوة
وهنشتهي اكتر للطُعم والتأويل
ونشد بعض فنرد يمكن
يبقي الصديق
ونموِّت الفحم البريئ
و مع كل غنوة هتتولد

نفتح طريق

جميع حقوق النشر محفوظة
التخطي إلى شريط الأدوات