جميع حقوق النشر محفوظة

رضوى إبراهيم تكتب: الإزدواجية صنعة !!

مقال

يعني بنعمل الحاجة وعكسها في نفس ذات اللحظة بس قبل ما نتعمق تعالوا نعرف يعني ايه ازدواجية وبعدها نتوغل في تفاصيلها الموجودة في حياتنا بصفة شبه دائمة.. الازدواجية في المجتمع بتكون متركز مفهومها في الحكم علي الاشياء.. وهو بيتصنف من ضمن الامراض النفسية المنتشرة في المجتمع.. وبتكون اساس المشكله ان الافراد ما بيحطوش نفسهم مكان الاخرين في مواقف معينه بتحدث للاخر … فبالتالي الحكم بيكون سلبي … رغم انه لو لفت الايام واتحطوا في نفس الموقف ممكن يكون رد فعلهم اسوء من الاخر…بالبلدي يعني بيحرم علي الناس اللي بيحلله علي نفسه!!!!

شوفت فلان عمل ايه … بلاش قلة ادب؟؟؟؟
وهو في أوضته الضلمه بيعمل اسوء من كدا بكتير …. بس المهم انه قدام الناس صاغ سليم وانضف من الصيني بعد غسيله…. قدام نفسي مش مشكله …. نفسي مننا وعلينا ….وده الدارج المباشر … في بقى الدارج غير المباشر وبيحصل بشكل شبه يومي … زي مثلا بنكره ناس عشان نجاحها مش سلوكها ؟!!! اه والله ده بيحصل … بتحس بقمه الازدواجيه تبقى قاعد بين الناس تقول انا احسن حاجه فيا طيبتي … قلبي ده مفيش اطيب منه … بس يا حج القلب الطيب مبيكرهش اصلا!!!!

لكن انت بقى بتكره الناجح!!!! دي فعلا اللي غريبه … ده لسه كمان انواع من الاذواجيه ….زي مثلا الشاب اللي بيخرج مع البنت اللي بيحبها ويجبلها هدايا …وقافل علي أخته بالضبه والمفتاح … ده غير بقي انه لا بيبقى حنين عليها ولا بيخرجها طيب فيها ايه طالما انت شايف نفسك دكر وانت اللي تخرج مع بنت وتخرجها وتفسحها بس اختك لا … بحجه … لا انا أختي محترمه!!!!… طيب البنت اللي بتخرج معاك دي قليله الادب!!!!! … في الحاله دي الازدواجيه بيكون ليها أكتر من اجابه …. الاجابه الاولي …. هو انتي شوفتني اتجوزتها دي تفاريح…طيب ترضي ان حد يعمل تفاريح مع اختك … الرد السريع الايام دي … اخرجي من دماغ امي … الرك علي البيت اللي معرفش يربي!!! …. الازدواجيه التانيه بقى لو الشاب متربي شويه … هيرد يقولي … بصي انا ضامن نفسي بس مش ضامن باقي الشباب …. مممممممممم …طيب قبل ما نتنقل علي امثله تانيه …واقف في زوري سؤال … طيب ليه مع البنت اللي بتحبها … صوتك بيبقى واطي … وكيوت …ومع اختك … اكويلي الهدوم … حطيلي اكل … علي فكره اختك بتلجأ في سن صغير انها تعرف شاب مش قله أدب منها …. لا …. دي عايزه تحس بالامان عايزه تحس انها محبوبه وفي حد بيهتم بيها ….يعني فيها ايه لما تدلع أختك!!!تجبلها هديه!!!! تاخدها وتخرجها…. تلاقي الرد سريع … اه ماشي انا ممكن اعمل كل اللي فات الا تاخدها وتخرجوا دي … ليه ؟!!! لان الناس هتفتكر ان اختي ماشيه مع واحد !!!!

نعمممممممممممممممم؟؟؟؟ ناس مين دول يخرب بيت الازدواجيه … ما اللي يكلم يكلم طالما احنا صح….في بقى ازدواجيه منتشره في مجتمعتنا …. وهي ان مينفعش نتريق علي حد…مينفعش نقلل من شأن حد … ونحس بالانكسار لو حد عمل فينا كده ونلوم …. واول ما تيجي الفرصه ….بتلاقيك بتتريق علي خلق الله التخين والرفيع اللي بيتكلم بسرعه واللي بيتهته …اللي بيسقط … من غير ما نراعي مشاعر الغير … بيحصل!!! بنقعد نكلم ونقول لازم يكون في نقاش حضاري لازم نسمع بعض … لازم منكونش متعصبين ونقعد نقارن بالغرب شوفوا الغرب الحوار بيكون يا تقنعني يا اقنعك…. اول ما نيجي لساعه الجد لو رايك مخالف لرايى هتعصب وهقفش وممكن اتقمص واقوم واخاصمك واقول عليك متخلف…. الله …. والكلام اللي فات ؟!!!! بلح…كلام ….في كمان نوع من الازدواجيه بس عند الستات اكتر …زي مثلا لو عند صاحبتها مشكله مع خطيبها او جوزها …. مثلا شريك حياتها عصبي اوي او شكاك او بتاع بنات … ترد عليها علي طول وايه اللي هيصبرك علي ده انفدي بجلدك …. انتي عبيطه هتستمري …. انتي معندكيش شخصيه وتستاهلي انه يعمل معاكي اكتر من كده ….. واول ما المشكله تبقي عندنا وخصوصا في بداية المشكله… عادي بكره يتغير … ما انتي لسه قايله انه مش هيتغير ومافيش حد بيتغير ….. لالالا … شريكي غير اي راجل في الدنيا دا بيحبني …. ما صاحبتك اللي انتي نصحتيها كانت بتقول نفس الكلام !!!! لا تعليق…في نوع تاني من الازدواجيه منتشر اوي الايام دي بين الولاد والبنات …اول لما يرتبطوا علي الفيس بوك الحاله الاجتماعيه تتغير وتبقى علي علاقه بفلان او فلانه ؟؟؟؟؟ والناس تبارك وتهني ويتقلب علي الفيس بوك فرح العمده …. دي علي علاقه يعني ماشي او ماشيه معاه…ولما تيجي تتكلم … يقولوك انت بلدي … طيب بلاش دي …. اول ما يحصل خلاف … ويتخصموا او يبطلوا مشي مع بعض … البلوكات تشتغل ….. وتشتغل أغنيه عايز جوابتك خدها أرجوك متعطلنيش !!!ايه علاقه البلوك بااننا انفصلنا!!!!…

ودا يخلينا نتنقل لنوع اخري من الازدواجيه … هو طالما انا وانت (مش مهم انا وانت دي ايه بنحب بعض مخطوبين متجوزين … بنتين اصحاب … زمايل في الشغل …..الخ) اول لما نختلف يشتغل التلقيح علي الفيس بوك ….منشورات عن الخيانه والغدر والصديق الجبان وقسوة القلب ووشوش حزينة تنزل …. ولا تأسفنا علي غدر الزمان …. واربط حبيبك باستك لو رجع كان بها لو مرجعش سيب الاستك خليه يلسعه…في ايه يا جماعه!!!!دا غير بقى الاهالي مسموح للولد يتاخر لكن البنت لا مسموح للولد يصاحب بنات لكن البنت لا …. علي فكره غير مقبول البنت او الولد يتاخروا … غير مقبول ان الولد يمشي مع بنات ونقول عليه ده فتك …. فتك ايه بس … انت كده بتدمره وبتربيه علي الحرام … ما هي دي البدايه ….الازدواجيه نابعه من انانيه الانسان انه بيحلل لنفسه اللي بيحرمه علي غيره بيترتب عليها حاجات كتير فيما بعد غلط بتلاقي الولد اللي اتربي ان المشي مع البنات فتاكه بيوصل لمرحله انه بيزني وبعدها بيكون خايف من اللي عمله لا يتعمل في مراته واخواته البنات وامه فبيقفل عليهم وبيشك في كل تصرفاتهم فبالتالي الاخت هتطلع معقده سواء هتنحرف وتعمل كل حاجه غلط او هتتعقد من الرجاله كلهم … اما الزوجه هتكون تعيسه او تخرب البيت … لما بتتريق علي حد ازدواجيتك دي بتكسره بدل ماتكون انت سبب قوته بوقوفك جنبه … مش صح اني طول الوقت اقول انا طيب انا مابغيرش انا ما بزعلش حد انا بتمني الخير لكل الناس وساعه الجد بكره اللي نجح … بغير لما القي علاقه زوجيه ناجحه … بتغاظ واحقد لما القي ناس بتضحك من قلوبها … واقول اشمعنا انا اللي كده ابقى مستني ذل الناس وكسرتهم وفشلهم وقاعد مستني عشان افرح وناري تبرد … تبرد ليه هما عملولك حاجه… لا … امال … مش عارف …بنقول كلام عشان نجمل نفسنا في عيون الناس واحنا مشوهين قدام نفسنا…. بنقول شعارات فاهمنها غلط …. الجمال جمال الروح … طيب يعني ايه ؟! الرد يعني الطيبه خفة الدم … لا يا استاذ مش ده بس … جمال الروح انك تزرع السلام النفسي جواك انك تبقى من جوه ومن بره واحد انك تبقى قدام الناس زي من وراهم …. ان اللي لسانك بيقوله هو هو اللي قلبك بيقوله …. ونرجع نقول ان اي مشكله في مجتمعنا حتي المشاكل الاقتصاديه والسياسه مش الاجتماعيه بس … اساسها التربيه … انا لما بربي جيل صح ويكبروا ويبقوا مسئولين عن البلد او الامن او علي بيتهم وعيالهم يبقى جيل متصالح هيطلع جيل صالح …. اقعد احسبها حسبه بسيطه اوي …. هتلاقي ان الكوارث والمشاكل اللي بنعشها حتي الازدواجيه احنا سببها …عشان نشأتنا غلط … عشان اتربينا علي عيب الناس … مش حرام ربنا … ربنا رب قلوب … رب رحمه … رب عدل ….من الاخر كل حرام عيب بس مش كل عيب حرام … الازدواجيه حرام عشان بتوصل لخطايا وممكن توصل لكبائر … اقف مع نفسك وقفه صح …وشوف ايه الصح وأعمله … حياتك إختيارتك…. الازدواجيه صنعه بس ممكن تغير صنعتك عادي يعني 🙂 .

www.facebook.com/ibuyeg

التعلقات

جميع حقوق النشر محفوظة
التخطي إلى شريط الأدوات