جميع حقوق النشر محفوظة

بيت جديد قصيدة من إبداعات مصطفي علي حسن.

قصيدة

مصطفي علي حسن

إستمررًا للخدمة التي أطلقتها «شبكة حلوان أون لاين الإخبارية» “إبداعات” لنشر إبداعات شباب حلوان في جميع المجالات ..  “بيت جديد” قصيدة من إبداعات مصطفي علي حسن 19 سنة من منطقة عرب راشد.

بتلم ليه.. الهدمتين والطرحتين والشبشبين ؟!

ماتقولي يبني واخدني فين؟!

“على بيت جديد” مش عايزة يبني بيت جديد

البيت ده انا عشت فيه 50 سنة ومعرفش غيره اي بيت…..

انا جيت عروسة صغيرة وقعدت فيه لمّا اتحنيت…

أسأل بلاط الأرض!؟وأسأل كل حين…

مش عايزة غيره اي بيت انا عشت يبني سنين هنا…

وأتمنى أموت برضك هنا على فرشتي.. ومخدتي.. والبطانية واللحاف…

افتح عينيا كل يوم….

وأقفل عينيا كل يوم على إيد ابوك بتضمني

في صورة زفاف بتدفي قلبي وتحضنه في سنين عجاف

وأنا عارفة يبني أن خدتني للبيت الجديد

انا راح أخاف وانا يبني مش عايزة أخاف!!.

الأوضة دي لِسه عايشة ولّا أبوك عمري اللي فات أصل الحبايب لو سابوك…

بيعيشوا فيك بالذكريات….

خليني يبني ولّا ابوك أصحى وأبات

وأعيش معاه باقي الساعات

وأشم ريحته في الحاجات مين اللي قالك أنه مات؟؟؟!

لِسه البدل جوا الدولاب….

جنب السرير آخر كتاب….

لِسه سجادة الصلاة السبحة فوقها منورة…

ولِسه بسمع ضحكته وسط السكات….

مين اللي قالك أنه مات؟؟!

انا عايشة يبني بحاجة أبوك متونّسة وبدخلتك عليا ويّا العيال متونّسة

وانا يبني عارفة لو خدتني للبيت الجديد راح اتّنسي…..

وانا يبني مش عاوزة اتّنسي!!؟

فإن محتاج الوسع لجل العيال؟؟

هات العيال انا عندي يبني سرير كبير

حارقد على حرف السرير وأسيب لهم باقي السرير….

وإن كنت محتاج السرير!!؟.. خد السرير!!؟

إنشالله أنام على الحصير…

لكن انام وسط الأمان…

خليني يبني في وسطهم

قدرني واحدة منهم باقي الزمان… وماهوش كتير؟!

وحياتك انت!!؟ ماهو كتير انا مش هعيش أد اللي عيشته ولا نفسي أعيش بعد اللي شوفته!!؟

كمّل جميلك..! وأستر الباقي من حياتي…

وانا عُمري يبني قصاد عينيك..

فرّط في أمي أو حماتي؟؟؟!!

إن كان على ضيق المكان ما انا قولتلك خُد السرير!!!

وإن كان على ضيق المعيشة فأبوك سايبلي معاش كبير قسمته يبني من زمان…

النص ليك والربع مصروف العيال…

والباقي مصروف الدوا!!

لكن خلاص وحياة عينيك ما عاد حايلزمني الدوا…

خد المعاش!!!!!!!؟؟؟؟ كل المعاش لكن بلاش….

ترميني في البيت الجديد..

وأحس أن ربايتي فيك راحت…

معلش يبني عشان خاطري بلاش…

بس متنساش!! لمّا أموت تبقى تفتكرني..

وتدعيلي بالرحمة بس بلاش….

تلم الهدمتين ونروح البيت الجديد…

 

www.facebook.com/ibuyeg

التعلقات

جميع حقوق النشر محفوظة
التخطي إلى شريط الأدوات